www.tsp68tvonline.com
ខេត្តព្រៃវែង ៖ ពលរដ្ឋរស់នៅក្នុងភូមិពីរក្នុងទឹកដីឃុំរកា ស្រុកពារាំង ខេត្តព្រៃវែង បានស្នើដល់ថ្នាក់ដឹកនាំ ជាពិសេសសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមការងារគណបក្យប្រជាជនខេត្តព្រៃវែង និងបាត់ដំបង មេត្តាត្រួតពិនិត្យការងារ ឬព្យួរការងាររបស់មេឃុំរកា ឈ្មោះ នេត នឿន ជាបណ្ដោះអាសន្ន ដោយពួកគាត់បានចោទមេឃុំរូបនេះថាបានឃុបឃិតជាមួយឈ្មួញដីឈ្មោះ ចេស ហៀប ក្លែងឯកសាររំលោភយកបរិវេណដីប្រភពមេទឹក និងដីព្រៃលិចទឹកដែលពលរដ្ឋប្រើប្រាស់ទៅធ្វើជាកម្មសិទ្ធិឯកជន។
តំណាងពលរដ្ឋបញ្ជាក់ថា វិវាទដីធ្លីនេះពួកគាត់ធ្លាប់បានដាក់ពាក្យបណ្តឹងទៅកាន់លោក នេត នឿន មេឃុំរកា ឲ្យជួយរកដំណោះស្រាយជាបន្តបន្ទាប់ ប៉ុន្តែបែរជាមេឃុំរូបនេះមិនយកឯកសារផ្តើមឲ្យមានទំនាស់ដីធ្លីខាងលើនេះមកដោះស្រាយទេ មិនត្រឹមតែប៉ុណ្ណោះ បានទុកពាក្យបណ្តឹងរបស់ពលរដ្ឋចោលរាប់ឆ្នាំថែមទៀត ហើយលោកមេឃុំរូបនេះតែងមកគំរាមប្តឹងពលរដ្ឋទាំងឡាយណាដែលហ៊ានចេញមុខតវ៉ារក្សាដីព្រៃប្រភពមេទឹកនៅឃុំរកា នេះដាក់គុកថែមទៀតផង។
តំណាងពលរដ្ឋក៏បានចោទលោក នេត នឿន ទៀតថាមានចេតនាលាក់កំបាំងឈ្មួញដីឈ្មោះ ចេស ហៀប ដែលចូលមកទន្ទ្រានកាន់កាប់ដីប្រភពមេទឹក និងលាក់បាំងឯកសារពាក់ព័ន្ធនឹងការទិញលក់ដីសាធារណៈរបស់រដ្ឋ។
ក្រុមប្រជាពលរដ្ឋទទូចឲ្យថ្នាក់ដឹកនាំជួយការពារដីបរិវេណប្រភពមេទឹកក្រចាប់ ដែលត្រូវបានលោក នេត នឿន និងលោក ចេស ហៀប ឃុបឃិតក្លែងឯកសារប៉ុនប៉ងរំលោភធ្វើជាកម្មសិទ្ធិឯកជនខុសច្បាប់ មកដាក់ជាសម្បត្តិរដ្ឋ និងទុកឲ្យពលរដ្ឋប្រើប្រាស់ដូចដើមវិញពីព្រោះទីតាំងដីនោះពួកគាត់ធ្លាប់ប្រើប្រាស់តាំងពីដូនតាមកម្លេះ។
ឆ្លើយតបការចោទប្រកាន់នេះ លោក្ នេត នឿន មេឃុំរកា ត្រូវបានគេហទំព័រ «កម្ពុជាថ្ងៃនេះ» ស្រង់សម្ដីកាលពីទី២១ ខែសីហា ឆ្នាំ២០២១ ថា រូបលោកមិនបានឃុបឃិតជាមួយលោក ចេស ហៀប ក្លែងឯកសាររំលោភយកដីប្រភពមេទឹកដូចពលរដ្ឋរស់នៅភូមិត្រកៀត ចោទប្រកាន់នោះទេ។ លោកបន្តថា រាល់ឯកសារផ្សេងៗដែលទាក់ទងវិវាទដីធ្លីនៅមូលដ្ឋានឃុំរកា នេះ គឺបានកើតឡើងតាំងពីអាណត្តិមេឃុំមុនៗមកម្ល៉េះ។ លោកច្រានចោលចំពោះការចោទប្រកាន់របស់ប្រជាពលរដ្ឋរស់នៅភូមិត្រកៀត ដែលលើកឡើងនេះថាជារឿងមិនពិតទេ។
ដោយឡែកលោក ចេស ហៀប ដែលពលរដ្ឋភូមិត្រកៀត ចោទថាបានចូលរួមក្លែងឯកសារជាមួយលោក នេត នឿន មេឃុំរកា រំលោភយកដីប្រភពមេទឹកក្នុងមូលដ្ឋាននេះ ក៏ច្រានចោលចំពោះការចោទប្រកាន់នេះដែរ។ លោកថា ការចោទប្រកាន់លើរូបលោកពីសំណាក់ពលរដ្ឋមួយចំនួនខាងលើនេះ គឺខុសពីការពិតទាំងស្រុង ដោយដីនោះលោកមានឯកសារកាន់កាប់ត្រឹមត្រូវចេញដោយអាជ្ញាធរមូលដ្ឋានតាំងពីឆ្នាំ២០០៨ មកម្ល៉េះ។
ប្រជាពលរដ្ឋរស់នៅភូមិត្រកៀត បានទទូចស្នើសុំថ្នាក់ដឹកនាំមេត្តាត្រួតពិនិត្យការងារ ឬព្យួរការងាររបស់មេឃុំរកា ឈ្មោះ នេត នឿន ជាបណ្ដោះអាសន្ន ព្រមទាំងជួយការពារប្រភពមេទឹកឲ្យបានគង់វង្ស និងរក្សាឲ្យនៅសភាពដើមវិញ ព្រោះទីតាំងដីនេះជាដង្ហើមរស់របស់ប្រជាពលរដ្ឋរស់នៅឃុំរកា សម្រាប់ប្រើប្រាស់ដល់វិស័យកសិកម្មផង និងធ្វើរបរនេសាទត្រីចិញ្ចឹមជីវិតជាលក្ខណៈគ្រួសារផង៕
0 Comments:
Post a Comment
KKK