www.tsp68tvonline.com
សហរដ្ឋអាមេរិក ៖ លោកប្រធានាធិបតីសហរដ្ឋអាមេរិក ចូ បៃដិន បានទទួលស្គាល់ពីការជម្លៀសមនុស្សដ៏ច្រើនចេញពីអាហ្វហ្គានីស្ថានមិនមែនមានន័យថា គ្មានហានិភ័យនោះទេ។
ថ្លែងនៅសេតវិមាន លោក បៃដិន លើកឡើងថាអាមេរិកបានជម្លៀសមនុស្ស១៣០០០នាក់ហើយរហូតដល់ពេលនេះនៅក្នុងយន្តហោះដ៏ធំ និងលំបាកបំផុតមួយក្នុងប្រវត្តិសាស្ត្រ។
ប៉ុន្តែការលើកឡើងរបស់លោកប្រធានាធិបតីថា ការជម្លៀសរបស់អាមេរិកមិនត្រូវបានជំទាស់ដោយតាលីបង់គឺផ្ទុយពីរដ្ឋមន្ត្រីក្រសួងការពារជាតិរបស់លោក។
លោក បៃដិន បានលើកឡើងថា ៖«ពលរដ្ឋអាមេរិកណាចង់មកផ្ទះ យើងនឹងនាំគាត់មកផ្ទះ។ មិនបានធ្វើឲ្យមានកំហុសទេ។ បេសកកម្មជម្លៀសនេះគឺគ្រោះថ្នាក់។ វាពាក់ព័ន្ធនឹងហានិភ័យដល់កម្លាំងប្រដាប់អាវុធរបស់យើង ដែលកំពុងប្រតិបត្តិនៅក្នុងការលៈទេសៈដ៏លំបាក»។
លោកបន្ថែមថា ៖«ខ្ញុំមិនអាចសន្យាពីអ្វីដែលជាលទ្ធផលចុងក្រោយយ៉ាងណា ឬថា វានឹងមិនមានហានិភ័យនៃការបាត់បង់ឡើយ។ ប៉ុន្តែក្នុងនាមជាមេបញ្ជាការ ខ្ញុំអាចធានាអ្នកថា ខ្ញុំកៀរគរធនធានចាំបាច់គ្រប់បែបយ៉ាង»។
ទោះបីជាយ៉ាងណា របាយការណ៍ជាច្រើនពីរដ្ឋធានីកាប៊ុលបានលើកឡើងថា ពលរដ្ឋអាមេរិកកំពុងពិបាកទៅកាន់ព្រលានយន្តហោះ។ រដ្ឋមន្ត្រីក្រសួងការពារជាតិអាមេរិក លោក Lloyd Austin បានប្រាប់សមាជិកសភាកាលពីថ្ងៃសុក្រថា ពលរដ្ឋអាមេរិកដែលកំពុងព្យាយាមចាកចេញពីអាហ្វហ្គានីស្ថានត្រូវបានសកម្មប្រយុទ្ធតាលីបង់វាយដុំ។ នេះបើតាមការផ្សាយរបស់ Politico។
ស្ថានភាពជម្លៀស
លោកប្រធានាធិបតីមានប្រសាសន៍ថា ឈុតឆាកប៉ុន្មានថ្ងៃចុងក្រោយចេញពីរដ្ឋធានីកាប៊ុលគឺបែកទ្រូងហើយ។ រូបភាពនៃរដ្ឋធានីអាហ្វហ្គានីស្ថានបង្ហាញពីហ្វូងមនុស្សកំពុងរត់ដើម្បីព្យាយាមភៀសខ្លួន ខណៈតាលីបង់បង់បានកាន់កាប់ប្រទេស។
លោក បៃដិន បានលើកឡើងកាលពីដើមសប្តាហ៍នេះថា លោកបានកំពុងពិចារណារក្សាកម្លាំងអាមេរិកនៅអាហ្វហ្គានីស្ថានបន្តទៀតដើម្បីធានាដល់ការជម្លៀសពលរដ្ឋអាមេរិកទាំងអស់។
លោកបញ្ជាក់ថា កងទ័ពអាមេរិកជិត៦០០០នាក់នៅសមរភូមិអាហ្វហ្គានីស្ថានបានជួយដល់ការប្រឹងប្រែងជម្លៀស និងគ្រប់គ្រងស្ថានការណ៍នៅព្រលានយន្តហោះកាប៊ុល។
ប៉ុន្តែអ្នកដែលចង់ចាកចេញពីអាហ្វហ្គានីស្ថានប្រឈមនឹងហ្វូងមនុស្សកក់កុញ និងប៉ុស្តិ៍ត្រូតពិនិត្យរបស់តាលីបង់តាមផ្លូវទៅព្រលានយន្តហោះ។
ច្រានចោលបរាជ័យ និងខូចកេរ្តិ៍ឈ្មោះអាមេរិក
រដ្ឋបាលប្រធានាធិបតី ចូ បៃសិន នៅសប្តាហ៍នេះធ្វើឲ្យកើតមានចម្ងល់ជាច្រើនផ្ទួនៗថាតើសេវាកម្មចារកម្មសម្ងាត់អាមេរិកទំនងជាយល់ច្រឡំធ្ងន់ធ្ងរចំពោះស្ថានភាពនៅអាហ្វហ្គានីស្ថាន។
កាលពីថ្ងៃសុក្រ លោក បៃដិន បានច្រានចោលម្តងទៀតនូវសញ្ញាណណាមួយនៃបរាជ័យចារកម្មសម្ងាត់ ដោយមានប្រសាសន៍ថា មានមតិឯកច្ឆន្ទក្នុងចំណោមមន្ត្រីដែលតាលីបង់ឡើងកាន់អំណាចលឿនគឺទំនងជាមិនខ្ពស់ទេ។
លោកប្រធានាធិបតីក៏បានច្រានចោលចំពោះការលើកឡើងថាស្ថានភាពនៅអាហ្វហ្គានីស្ថានបានធ្វើឲ្យខូចកេរ្តិ៍ឈ្មោះអាមេរិកនៅលើឆាកអន្តរជាតិ។ លោកបានទទួចថា «មិនមានបញ្ហាចម្ងល់លើការជឿជាក់របស់យើងពីសម្ព័ន្ធមិត្តទូទាំងពិភពលោកឡើយ»។
អធិប្បាយសង្គ្រាមនៅអាហ្វហ្គានីស្ថានជា«ការប្រឹងប្រែងរួម»ជាមួយប្រទេសជាសម្ព័ន្ធមិត្ត លោក បៃដិន លើកឡើងថា លោកនឹងកោះប្រជុំមួយជាមួយសម្ព័ន្ធប្រទេស G7 ដើម្បីពិភាក្សាជំហានបន្ទាប់។
ព្យាយាមយកឈ្នះសាធារណៈ
លោក ចូ បៃដិន បានកត់សំគាល់ពីការអាណិតអាសូរកំឡុងពេលលោកថ្លែងសុន្ទរកថា និងមានប្រសាសន៍ថា លោកគិតថា គ្មាននរណាម្នាក់គ្មានអារម្មណ៍ឈឺចាប់ទេនៅពេលឃើញរូបភាពទាំងនោះ។
វាខុសប្លែកពីការកត់សំគាល់ដែលបានលើកឡើងកាលពីដើមសប្តាហ៍នេះនៅពេលលោកបានបញ្ចេញសំឡេងការពារអំពីការសម្រេចចិត្តរបស់លោកក្នុងការដកកងទ័ពចេញ។ អ្នកបោះឆ្នោតទាំងសមាជិកគណបក្សប្រជាធិបតេយ្យ និងសាធារណៈឆ្ងល់អំពីយុទ្ធសាស្ត្ររបស់លោក និងអន់ចិត្តចំពោះវិធីដែលលោកស្តីបន្ទោសអ្នកដទៃ មិនថាលោក ដូណាល់ ត្រាំ ឬកងទ័ពអាហ្វហ្គានីស្ថានចំពោះមហន្តរាយនោះទេ។
យោងតាម FiveThirtyEight ដែលតាមដានការស្ទង់មតិបង្ហាញពីអ្នកបោះឆ្នោតជាច្រើនមិនទុកចិត្តលើភាពដឹកនាំរបស់លោកថា កម្រិតវាយតម្លៃលើការអនុម័តរបស់លោកឥឡូវនេះទាបបំផុតគឺត្រឹមតែ៤៩%ប៉ុណ្ណោះ ចាប់តាំងពីលោកកាន់តំណែងមក។
លោកប្រធានាធិបតីបានកំពុងព្យាយាមយកឈ្នះពួកគេត្រឡប់មកវិញ ប៉ុន្តែមនុស្សជាច្រើនយល់ឃើញថា ការប្រឹងប្រែងរបស់លោកយឹតពេលបន្តិចហើយ៕
ប្រែសម្រួល៖ វីរបុត្រ
ប្រភព៖ BBC
0 Comments:
Post a Comment
KKK